Një 20-vjeçar shqiptar i identifikuar si Kevin Mustafa ka humbur jetën mëngjesin e djeshëm në Bergamo, Itali. I riu shqiptar që planifikonte të martohej së shpejti vdiq kur po shkonte të takonte me motor të dashurën e tij.
20-vjeçari jetonte në zonën e Bergamos, bashkë me nënën e tij Fagny Moreira, me origjinë nga Ekuadori ndërsa babain e kishte shqiptar. Prindërit e tij ishin ndarë kur Kevin ishte ende i vogël dhe ai ishte rritur nga nëna e tij.
Sipas hetuesve që po merren me zbardhjen e ngjarjes, i riu po udhëtonte me motorin e tij përgjatë rrugës provinciale në via Padre Cesare Albisetti, pikërisht në qytetin ku banonte. Ai po shkonte në drejtim të Terno d’Isola kur, pak para orës 9 u përplas me një automjet tip “Citroen” që i doli para. Pasi humbi ekuilibrin dhe ra përtokë ai u përplas nga një makinë që erdhi nga kahu tjetër i rrugës. Lëndimet e marra në përplasjen me makinën e dytë ishin tepër të rënda, aq sa helmeta që mbante nuk i rezistoi goditjes dhe u thye.
E dashura e Mustafës, Jennifer, po e priste pasi të dy po kërkonin një shtëpi ku të banonin pas dasmës.
